Bargaante

Vun Wikipedia
Zur Navigation springen Zur Suche springen
Bargaante; Bergeent; Sandgoos; Vossaant
Bargaante up en Soltwisch
Systematik
Ünnerstamm: Warveldeerten (Vertebrata)
Klass: Vagels (Aves)
Ornen: Gösevagels (Anseriformes)
Familie: Aantenvagels (Anatidae)
Ünnerfamilie: Halfgöse (Tadorninae)
Tribus: Echte Halfgöse (Tadornini)
Geslecht: Buntgöse (Tadorna)
Oort: Bargaante
Wetenschoplich Naam
Tadorna tadorna
Linnaeus 1758

De Bargaante, ok Sandgoos oder Vossaant nömmt, (Tadorna tadorna) höört to de Halfgöse. Dat sünd Aantenvagels, de sotoseggen in’e Midden twuschen Göse un Aanten staht.

De Naams

De plattdüütschen Naams „Sandgoos“ un „Vossaant“ betreckt sik dor up, datt düsse Vagel in Löcker un (Voss-) Kuhlen unner de Eer bröden deit. „Bargaante“ warrt düsse Vagel up Nedersaksisch, Nedderlannsch, Westfreesch un Noordfreesch nömmt. Ob düsse Naam sik dor up betrecken deit, datt se ehre Eier good versteken (bargen) deit[1], oder datt se grote Tahlen vun Jungen groot trecken (bargen) deit, oder datt se sik unner de Eer in Kuhlen un Löcker bargen deit, oder, vunwegen datt se in de Dünen (Barge) leven deit, lett sik nich seggen. Up Hoochdüütsch heet se „Brandgans“. Dor an, datt se mol Aante un mol Goos nömmt warrt, kann een good sehn, datt se nich kloor na Göse oder Aanten hen insorteert weern kann. Vundeswegen warrt se na de hüdige Taxonomie to de Halfgöse rekent.

Kennteken

De Waart hett en roden Knubbel up sien Snavel sitten. Kopp un Hals vun de Vagels sünd swatt. Sunst sünd de Feddern meist witt mit af un an en poor swatte Stripen dormank. Um’e Bost hett de Bargaante en bruun Band. Been un Föte sünd vun en Farv as Fleesch, de Snavel is rood. De Bargaante is 55 bit 65 cm lang un 1 bit 1,5 kg swaar. Siene Flunken kann de Waart bit hen to 115 cm utspannen, de Aante bit hen to 70 cm.

Freten

De Bargaante fritt faken Waddsniggen, Schillendeerter, Insekten, lüttje Fische un Wörmer un bloß hen un wenn mol Grööntüüch.

Wie se sik vermehren deit

Dat Nest boot de Bargaante geern in Eerdlöcker, as in Kaninkenlöcker un Vosskuhlen, man ok in annere Gatten un Löcker, de se finnen deit. Dat warrt denn utpolstert mit Dunen. De Aante leggt 8 – 12 Eier. Wieldes de Waart up Wacht steiht, brott de Aante de Eier 28 Dage lang ut. De Küken könnt na 8 Weken flegen.

Wo de Bargaante vörkamen deit

Wo de Bargaante vörkamen deit
geel: Sommer
blau: Winter
gröön: dat ganze Johr

De Bargaante is to finnen an de Küsten vun Westeuropa un an en poor Küsten vun de Middellannsche See (as in Sardinien). Langs de Küst vun Flannern is se just so to finnen, as in de Nedderlannen un in Noorddüütschland. Dor brott se, man dat gifft ok Treckvagels un Wintergäste. Se hollt sik faken up de See up, man ok in de Dünen is se to sehn. De Populatschoon in Noordwest-Europa umfaat bi 100.000 Vagels. To’n Ruden versammelt se sik to’n gröttsten Del up’n Knechtsand in de Düütsche Bucht. Dor wesselt se de Feddern an de Flunken. Vun Anfang Juli af an dreept se dor in, un twuschen 20. Juli un 20. August is de gröttste Antahl vun Bargaanten up den Rudelplatz to finnen. In düsse Tied sütt man annerwegens man wenig Bargaanten.

Biller

Kiek ok bi

Belege

  1. Verschueren Groot Geïllustreerd Woordenboek, Standaard Uitgeverij, Antwerpen, 1991 ISBN 90-02-19015-8

Literatuur

  • Zwarts, Leo (1974) - Vogels van het brakke getijgebied : ecologische onderzoekingen op de Ventjagersplaten. Amsterdam : Bondsuitgeverij van de Jeugdbonden voor Natuurstudie (NJN, CJN en KJN).

Weblenken

Commons-logo.svg Bargaanten. Mehr Biller, Videos oder Audiodateien to’t Thema gifft dat bi Wikimedia Commons.